सोलापूर : सोलापूर महानगरपालिका सार्वत्रिक निवडणूक 2025-26 अंतर्गत 15 जानेवारी 2026 रोजी होणाऱ्या मतदानाच्या पार्श्वभूमीवर मतदान व मतमोजणी केंद्रांवरील सुविधांबाबत दुसरी समन्वय बैठक सोमवारी पार पडली. ही बैठक महापालिकेचे आयुक्त तथा निवडणूक निर्णय अधिकारी डॉ. सचिन ओम्बासे यांच्या अध्यक्षतेखाली झाली.
बैठकीत मतदान केंद्रांवरील मूलभूत सुविधा, मतदारांसाठी आवश्यक सोयी, सुरक्षा व्यवस्था तसेच मतमोजणी केंद्रांवरील नियोजन यावर सविस्तर चर्चा करण्यात आली. यासोबतच नामनिर्देशन अर्ज भरणे, अर्जांची छाननी, निवडणूक जाहिरातींसाठीचे नियम, कॉर्नर सभा व प्रचार कार्यक्रमासाठी घ्यावयाच्या परवानग्या आणि आचारसंहितेचे पालन याबाबत राजकीय पक्षांच्या प्रतिनिधींना मार्गदर्शन करण्यात आले.
आयुक्त डॉ. सचिन ओम्बासे यांनी स्पष्ट केले की, नामनिर्देशन व अर्ज छाननीची प्रक्रिया पूर्णतः पारदर्शक राहणार असून नियमबाह्य किंवा अपूर्ण अर्जांवर नियमानुसार कारवाई केली जाईल. जाहिराती व कॉर्नर सभांसाठी महापालिकेची पूर्वपरवानगी आवश्यक असून, वेळ, ठिकाण आणि ध्वनीमर्यादा यांचे काटेकोर पालन बंधनकारक राहील, असेही त्यांनी ठामपणे सांगितले. “निवडणूक म्हणजे नियमांची परीक्षा; समन्वय ठेवल्यास प्रक्रिया अधिक सुकर होईल,” असा स्पष्ट संदेशही त्यांनी दिला.
निवडणूक प्रक्रिया शांततामय व सुरळीत पार पाडण्यासाठी राजकीय पक्षांचे प्रतिनिधी व निवडणूक निर्णय अधिकारी यांनी परस्पर समन्वय साधावा, तसेच कोणताही नियमभंग होणार नाही याची दक्षता घ्यावी, असे निर्देश आयुक्तांनी दिले.
ही बैठक सकारात्मक वातावरणात पार पडली असून, निवडणूक यशस्वीपणे पार पाडण्यासाठी प्रशासनास सहकार्य करण्याची तयारी सर्व राजकीय पक्षांनी दर्शविली.
बैठकीस अतिरिक्त आयुक्त वीणा पवार, अतिरिक्त आयुक्त संदीप कारंजे, उपायुक्त आशिष लोकरे, मुख्य लेखा अधिकारी रत्नराज जवळगेकर, उपजिल्हाधिकारी (रो.ह.यो.) अंजली मरोड, उपजिल्हाधिकारी (भूसंपादन) अभिषेक देशमुख, उपविभागीय अधिकारी सदाशिव पडदुणे, भैरप्पा रामू माळी, विजया पांगारकर, सचिन इथापे, जयश्री आव्हाड, सहायक आयुक्त गिरीष पंडित तसेच विविध राजकीय पक्षांचे प्रतिनिधी उपस्थित होते.
