मुंबई : महाराष्ट्र विधिमंडळाचे पावसाळी अधिवेशन आज राष्ट्रगीताने औपचारिकरीत्या संस्थगित करण्यात आले. विधानसभा अध्यक्ष ॲड. राहुल नार्वेकर यांनी विधानसभेत पुढील अधिवेशन सोमवार, ८ डिसेंबर २०२५ रोजी नागपूर येथे होणार असल्याची घोषणा केली.
या अधिवेशनात विधानसभेचे कामकाज एकूण १३३ तास ४८ मिनिटे झाले, तर सरासरी दररोज ८ तास ५५ मिनिटे कामकाज झाले. सदस्यांची जास्तीत जास्त उपस्थिती ९०.२० टक्के तर सरासरी उपस्थिती ८२.२३ टक्के होती. अधिवेशनात १४ शासकीय विधेयके पुन्हा मांडण्यात आली, तसेच नियम २९३ अंतर्गत प्राप्त ५ पैकी सर्व ५ सूचना मान्य करून चर्चेसाठी सभागृहात घेतल्या गेल्या.
अध्यक्ष ॲड. राहुल नार्वेकर यांनी विधिमंडळाच्या कामकाजात सहकार्य करणाऱ्या सर्व सदस्यांचे व प्रशासनाचे आभार मानले.
दरम्यान, विधानपरिषदेचेही अधिवेशन आज राष्ट्रगीताने संस्थगित करण्यात आले. हे अधिवेशन ३० जून २०२५ पासून सुरू झाले होते. विधानपरिषदेचे पुढील अधिवेशनही ८ डिसेंबर २०२५ रोजी नागपूर येथेच होणार असल्याची माहिती देण्यात आली आहे.
