मुंबई, ४ ऑगस्ट २०२५ — राज्यातील ग्रामीण भागातील महिला बचत गटांनी तयार केलेल्या उत्पादनांना स्थिर आणि व्यापक बाजारपेठ उपलब्ध करून देण्यासाठी राज्य मंत्रिमंडळाने एक महत्त्वपूर्ण निर्णय घेतला आहे. याअंतर्गत “उमेद मॉल” या नावाने जिल्हास्तरावर विक्री केंद्रे (जिल्हा विक्री केंद्रे) उभारण्यात येणार आहेत.

ग्रामविकास व पंचायत राज मंत्री जयकुमार गोरे यांनी ही माहिती देताना सांगितले की, “पहिल्या टप्प्यात राज्यातील १० जिल्ह्यांमध्ये उमेद मॉल्स उभारण्यात येणार असून त्यासाठी २०० कोटी रुपयांची तरतूद करण्यात आली आहे.” या निर्णयाचा थेट फायदा राज्यातील महिला बचत गटांच्या आर्थिक सक्षमीकरणाला होणार आहे.

महिला गटांचे उत्पादनांना बाजारपेठ

राज्यात “उमेद” (महाराष्ट्र राज्य ग्रामीण जीवनोन्नती अभियान - MSRLM) या योजनेअंतर्गत हजारो महिला बचत गट कार्यरत आहेत. हे गट अन्न प्रक्रिया, गृहवस्तू, हस्तकला, वस्त्रोद्योग, सेंद्रिय उत्पादने अशा विविध क्षेत्रात उत्पादन करतात. मात्र, त्यांच्या उत्पादनांना योग्य बाजारपेठ उपलब्ध नसल्यामुळे त्यांना अपेक्षित उत्पन्न मिळत नसे. हे लक्षात घेऊनच उमेद मॉल ही संकल्पना पुढे आणण्यात आली आहे.

उमेद मॉल म्हणजे काय?

उमेद मॉल हे एक आधुनिक पद्धतीचे जिल्हास्तरीय विक्री केंद्र असेल, जिथे स्थानिक महिला बचत गटांची उत्पादने एकाच छताखाली विक्रीसाठी उपलब्ध असतील. यामध्ये उत्पादने प्रदर्शित करणे, विक्री करणे, विपणन सुविधा, पॅकेजिंग, ब्रँडिंग आणि डिजिटल पेमेंट अशा सुविधा उपलब्ध असतील.

पुढील टप्पा

गोरेंनी सांगितले की, पहिल्या टप्प्यातील यशानंतर उर्वरित जिल्ह्यांमध्ये देखील उमेद मॉल्स उभारण्यात येतील. या माध्यमातून महिला गटांचे उत्पन्न वाढून स्वावलंबन, आर्थिक स्थैर्य आणि स्थानिक अर्थव्यवस्थेचा विकास घडवून आणला जाईल, असा विश्वास व्यक्त करण्यात आला आहे.

सरकारचा दृष्टीकोन

राज्य शासनाने ग्रामीण भागातील महिलांचे सामाजिक व आर्थिक सशक्तीकरण हे उद्दिष्ट ठेऊन विविध योजनांची अंमलबजावणी केली आहे. उमेद मॉल ही योजना त्याच दिशेने एक टाकलेले महत्त्वाचे पाऊल असून, त्यातून महिला उद्योजकतेला चालना मिळेल व वोकल फॉर लोकल या संकल्पनेला प्रत्यक्षात उतरण्यात मदत होईल.