सोलापूर :- राज्य निवडणूक आयोगाने राज्यातील २४६ नगरपरिषद व ४२ नगरपंचायतींच्या सदस्य आणि अध्यक्ष पदांच्या सार्वत्रिक निवडणुकीचा कार्यक्रम जाहीर केला आहे. या अनुषंगाने सोलापूर जिल्ह्यातील ११ नगरपरिषद आणि १ नगरपंचायतीची निवडणूक होणार आहे.

या निवडणुका सुरळीत, पारदर्शक आणि शांततेत पार पाडण्यासाठी सर्व संबंधित अधिकारी-कर्मचाऱ्यांनी समन्वयाने काम करावे, असे आवाहन जिल्हाधिकारी तथा जिल्हा निवडणूक अधिकारी कुमार आशीर्वाद यांनी केले.

जिल्ह्यातील नगरपरिषद आणि नगरपंचायतींच्या सार्वत्रिक निवडणुकीच्या तयारीचा आढावा घेण्यासाठी आयोजित बैठकीत ते मार्गदर्शन करत होते.

बैठकीस मुख्य कार्यकारी अधिकारी कुलदीप जंगम, पोलीस अधीक्षक अतुल कुलकर्णी, अप्पर जिल्हाधिकारी गणेश निऱ्हाळी, निवासी उपजिल्हाधिकारी अभिजीत पाटील, उपजिल्हाधिकारी (महसूल) संतोषकुमार देशमुख, जिल्हा सहआयुक्त (नगरपालिका प्रशासन) योगेश डोके, तसेच सर्व नगरपरिषदांचे निवडणूक निर्णय अधिकारी, सहाय्यक निवडणूक निर्णय अधिकारी आणि उपविभागीय पोलीस अधिकारी दूरदृश्य प्रणालीद्वारे उपस्थित होते.

जिल्हाधिकारी आशीर्वाद यांनी पुढे सांगितले की,

“सर्व जिल्हास्तरीय नोडल अधिकारी, निवडणूक निर्णय अधिकारी आणि सहाय्यक निवडणूक निर्णय अधिकारी यांनी त्यांच्यावर सोपवलेल्या जबाबदाऱ्या नीट समजून घ्याव्यात. राज्य निवडणूक आयोगाच्या मार्गदर्शक सूचनांनुसार कामकाज काटेकोरपणे पार पाडावे आणि निवडणुका निर्भय, शांततेत व पारदर्शक वातावरणात होतील याची काळजी घ्यावी.”

तसेच सर्व नगरपरिषद व नगरपंचायत क्षेत्रातील कायदा व सुव्यवस्था टिकवण्यासाठी प्रांताधिकारी, उपविभागीय पोलीस अधिकारी आणि तहसीलदार यांनी संयुक्तपणे बैठका घेऊन नियोजन करावे, असेही त्यांनी निर्देश दिले. लोकसभा व विधानसभा निवडणुकीप्रमाणे सर्व आवश्यक माहिती संकलित करून निवडणूक प्रक्रियेची तयारी करावी, असेही त्यांनी नमूद केले.

प्रारंभी उपजिल्हाधिकारी (महसूल) संतोषकुमार देशमुख यांनी राज्य निवडणूक आयोगाच्या कार्यक्रमाची माहिती देत सर्व शासकीय यंत्रणांनी पार पाडावयाच्या जबाबदाऱ्यांचा सविस्तर आढावा दिला. लवकरच जिल्हा परिषद आणि पंचायत समिती निवडणुकीचा कार्यक्रमही जाहीर होण्याची शक्यता असल्याचे त्यांनी सांगितले.

जिल्हा सहआयुक्त योगेश डोके यांनी बार्शी, अकलूज, मोहोळ, पंढरपूर, अक्कलकोट, कुर्डूवाडी, करमाळा, सांगोला, मंगळवेढा, मैंदर्गी व दुधनी या नगरपरिषदांचा आणि अनगर नगरपंचायतीचा निवडणूक कार्यक्रम जाहीर झाल्याची माहिती दिली.

या निवडणुकांतून १५२ प्रभागांमधून २८९ सदस्य निवडले जाणार असून, ४९९ मतदान केंद्रे निर्माण करण्यात आली आहेत. यासाठी १२ निवडणूक निर्णय अधिकारी व १२ सहाय्यक निवडणूक निर्णय अधिकारी नियुक्त करण्यात आले असल्याचे त्यांनी सांगितले.

#election #zpelection #iaskumarashriwad #politicalnews